آئی ٹی شعبے میں بحران! ٹی سی ایس نے دیئے اشارے، تقریباً پانچ لاکھ ملازمین نوکری سے محروم ہونے کے خدشات

نئی دہلی: (کاوش جمیل نیوز) :معلوماتی ٹیکنالوجی کے شعبے کی سب سے بڑی کمپنیوں میں شامل ٹاٹا کنسلٹنسی سروسز (TCS) نے تقریباً 283 ارب ڈالر مالیت کے آئی ٹی سیکٹر میں بڑے پیمانے پر تبدیلی کے اشارے دیے ہیں۔ مصنوعی ذہانت (AI) پر مبنی ٹیکنالوجی کی تیزی سے ترقی کے باعث آئی ٹی انڈسٹری میں کئی تبدیلیاں ہو رہی ہیں۔
ٹی سی ایس نے 12 ہزار سے زائد ملازمین کو کم کرنے کا فیصلہ کیا ہے، جسے ماہرین اے آئی سے جڑی تبدیلیوں کا آغاز قرار دے رہے ہیں۔ ماہرین کا کہنا ہے کہ آئندہ دو سے تین سالوں میں اس 283 ارب ڈالر کے شعبے میں تقریباً پانچ لاکھ نوکریاں ختم ہو سکتی ہیں۔
اے آئی سے متعلق بڑھتے کام اور اس کے مقابلے میں ملازمین کی مہارت میں کمی کی وجہ سے ٹی سی ایس نے اپنے تقریباً 2 فیصد عملے کو فارغ کرنے کا فیصلہ کیا ہے۔ اس فیصلے سے کمپنی کے تقریباً 12,200 درمیانے اور سینئر سطح کے ملازمین نوکری سے ہاتھ دھو بیٹھیں گے۔ بھارت میں مڈل کلاس کے قیام میں اہم کردار ادا کرنے والے اس شعبے میں بنیادی کوڈنگ، مینوئل ٹیسٹنگ اور کسٹمر سپورٹ سمیت کئی کام اب تیزی سے اے آئی کے ذریعے کیے جا رہے ہیں۔
مارچ 2025 تک اس شعبے میں 56.70 لاکھ سے زائد افراد کام کر رہے تھے اور بھارت کی جی ڈی پی میں آئی ٹی انڈسٹری کا حصہ 7 فیصد سے زیادہ تھا۔ دنیا کی پانچویں بڑی معیشت میں یہ شعبہ براہِ راست اور بالواسطہ روزگار پیدا کرنے والا سب سے بڑا ذریعہ ہے، اس لیے اس کے متاثر ہونے سے دوسرے شعبے بھی متاثر ہوں گے۔
تاریخی طور پر بھارت کے زیادہ تر انجینئرز نے ٹیکنالوجی کے ساتھ خود کو ہم آہنگ کیا ہے، لیکن اے آئی کے بڑھتے استعمال کے باعث کارکردگی میں اضافے کے ساتھ موجودہ ملازمین میں سے کئی نئے ہنر نہیں سیکھ سکے، جس کی وجہ سے بے روزگاری میں اضافہ ہو رہا ہے۔ صنعت کے ماہرین اور ریکروٹمنٹ ایجنسیز کا کہنا ہے کہ اس وقت بھارتی آئی ٹی انڈسٹری ایک بڑے دورِ تبدیلی سے گزر رہی ہے اور نئے ہنر سیکھنا ناگزیر ہے۔ مستقبل میں زیادہ تر آئی ٹی کام اے آئی پر مبنی ہوگا، اس لیے نوکریاں جانے کا خطرہ برقرار رہے گا، جیسا کہ سیلیکون ویلی میں قائم کنسٹلیشن ریسرچ کے بانی اور صدر رے وانگ نے خبردار کیا ہے۔
آئی ٹی شعبے میں سب سے زیادہ خطرہ انفراسٹرکچر مینجمنٹ کے ملازمین کو ہے۔ کم تکنیکی مہارت رکھنے والے مینیجرز، آئی ٹی میں ٹیسٹنگ اور بگ فکسنگ کرنے والے ملازمین، بنیادی تکنیکی سپورٹ دینے والے ورکرز، نیٹ ورک اور سرور سے متعلق کام کرنے والے افراد کو سب سے زیادہ خطرہ ہے۔ ماہرین کا اندازہ ہے کہ آئندہ دو سے تین سالوں میں تقریباً 4 سے 5 لاکھ ملازمین اپنی نوکری سے محروم ہو سکتے ہیں کیونکہ ان کی مہارت کلائنٹس کی موجودہ ضروریات سے مطابقت نہیں رکھتی۔
ان نوکریوں میں سے تقریباً 70 فیصد کا تعلق 4 سے 12 سال کے تجربے والے ملازمین سے ہوگا۔ اس ممکنہ بے روزگاری سے سیاحت، لگژری شاپنگ اور رئیل اسٹیٹ جیسے شعبوں پر بھی منفی اثر پڑ سکتا ہے۔
ٹی سی ایس، انفوسس، ایچ سی ایل ٹیک، ٹیک مہندرا، وپرو، ایل ٹی آئی مائنڈ ٹری اور کوگنیزنٹ ملا کر 13 سے 25 سال کے تجربے والے 4,30,000 سے زیادہ ملازمین رکھتے ہیں، جیسا کہ اسٹافنگ فرم ایکسفینو نے بتایا۔