آربی آئی کا بڑا فیصلہ : دو ہزار روپے کے نوٹ چلن سے ہونگے باہر، کب سے کب تک بدلے جائیں گے نوٹ، پڑھیں تفصیلی رپورٹ

نئی دہلی: (کاوش جمیل نیوز) : ریزرو بینک آف انڈیا نے جمعہ کو 2000 روپے کے نوٹوں کو چلن سے نکالنے کا بڑا فیصلہ کیا ہے۔ 23 مئی سے 30 ستمبر تک، آپ اپنے 2000 کے نوٹ بینک میں جمع کرا سکتے ہیں۔ 20 ہزار روپے یعنی 10 نوٹ ایک وقت میں جمع کیے جا سکتے ہیں۔ ریزرو بینک آف انڈیا نے جمعہ کو 2000 روپے کے نوٹوں کو چلن سے نکالنے کے فیصلے کا اعلان کیا ہے۔ لیکن 2000 روپے کے نوٹ قانونی ٹینڈر کے طور پر جاری رہیں گے۔ ریزرو بینک آف انڈیا نے “مارکیٹ میں دیگر مالیت کے نوٹوں کی مناسب دستیابی” کا حوالہ دیتے ہوئے بازار سے 2000 روپے کے نوٹوں کو واپس لینے کے اپنے فیصلے کا اعلان کیا ہے۔
اگرچہ ریزرو بینک آف انڈیا نے 2000 کے نوٹوں کو چلن سے واپس لے لیا ہے، لیکن فی الحال وہ نوٹ غلط نہیں ہوں گے۔ انہیں دی گئی آخری تاریخ تک جمع کرایا جا سکتا ہے۔ وزیر اعظم نریندر مودی نے 8 نومبر 2016 کو 500 اور 1000 کے نوٹوں کو بند کر دیا تھا۔ ان کی جگہ 500 اور 2000 کے نئے نوٹ جاری کیے گئے۔ 2000 کا نوٹ نومبر 2016 میں جاری کیا گیا تھا۔ اس کے بعد آر بی آئی نے بھی 2019 سے 2000 کے نوٹوں کی چھپائی روک دی تھی۔
دو ہزار روپے کا نوٹ آر بی آئی ایکٹ 1934 کے سیکشن 24(1) کے تحت متعارف کرایا گیا تھا۔ 500 اور 1000 روپے کے پرانے نوٹ بند ہونے کے بعد کرنسی کی ضرورت کے پیش نظر 2000 روپے کے نوٹ مارکیٹ میں لائے گئے۔ مارکیٹ میں 500 روپے کے نوٹوں کی کافی تعداد میں آنے کے بعد 2000 روپے کے نوٹ متعارف کرانے کا مقصد کچھ بے سود تھا۔ اس لیے 2018-19 میں 2000 روپے کے نوٹوں کی چھپائی روک دی گئی۔
مرکزی حکومت نے توقع کی تھی کہ 2016 میں نوٹ بندی کے دوران بدعنوان عہدیداروں کے ذریعہ گھر میں چھپا ہوا کم از کم 3-4 لاکھ کروڑ روپئے کا کالا دھن باہر آجائے گا۔ اس پورے لین دین میں صرف 1.3 لاکھ کروڑ روپے کا کالا دھن نکلا۔ لیکن اب نوٹ بندی کے بعد جاری کردہ 500 اور 2000 کے نئے نوٹوں میں 9.21 لاکھ کروڑ روپے غائب ہو گئے ہیں۔ درحقیقت، ریزرو بینک آف انڈیا (آر بی آئی) نے 2016-17 سے 2021-22 تک اپنی سالانہ رپورٹ میں اس سلسلے میں معلومات دی ہیں۔ آر بی آئی نے 2016 سے اب تک 500 اور 2000 روپے کے کل 6,849 کروڑ کرنسی نوٹ چھاپے ہیں۔ جن میں سے 1,680 کروڑ سے زیادہ کرنسی نوٹ بازار سے غائب ہیں۔ ان گمشدہ نوٹوں کی قیمت تقریباً 9.21 لاکھ کروڑ روپے ہے۔ قانون کے مطابق جس رقم پر ٹیکس ادا نہیں کیا گیا وہ کالا دھن تصور کیا جاتا ہے۔ اس 9.21 لاکھ کروڑ روپے میں لوگوں کے گھروں میں جمع کی گئی بچت بھی شامل ہو سکتی ہے۔ آر بی آئی کے افسران نے بھی نام ظاہر نہ کرنے کی شرط پر اعتراف کیا کہ کرنسی سے غائب ہونے والی رقم کو سرکاری طور پر کالا دھن نہیں سمجھا جاتا، لیکن اس امکان کو رد نہیں کیا جاسکتا کہ اس رقم کا بڑا حصہ کالا دھن ہے۔