آئندہ مرکزی معلم اہلیتی امتحان (CTET) پورے ملک میں 21 جنوری 2024ء اتوار کوہوگا منعقد ؛ امتحان کے لیے آن لائن فارم بھرنے کی مدت 3 نومبر سے 23 نومبر 2023ء تک ؛ پڑھیں مکمل رپورٹ
پونے : (علی انجم رضوی) : پورے ملک میں منعقد ہونے والے مرکزی معلم اہلیتی امتحان (CTET) کے لیے سینٹرل بورڈ آف سیکنڈری ایجوکیشن (CBSE) نے نئی عوامی اطلاع (Notification) 2 نومبر 2023ء کو جاری کی۔ اس اطلاع میں CBSE نے بتایا کہ 18 واں مرکزی معلم اہلیتی امتحان 21 جنوری 2024ء اتوار کو منعقد ہونے جا رہا ہے۔ اس اطلاع نامے میں بتایا گیا ہے کہ امتحان کا آن لائن فارم بھرنے کی مدت 3 نومبر 2023ء سے 23 نومبر 2023ء تک ہے۔ امتحان کی فیس بھی 23 نومبر 2023ء تک رات 11:59 بجے تک آن لائن بھری جا سکتی ہے۔ یہ امتحان 20 زبانوں میں ملک کے 135 شہروں کے امتحانی مراکز پر رکھا جائے گا۔ امتحان سے متعلق تفصیلی معلومات ویب سائٹ https://ctet.nic.in پر مہیا کرائی جائے گی۔ آن لائن عریضہ فارم اسی ویب سائٹ پر بھرے جا سکتے ہیں۔
اس امتحان کا نصاب، زبان، اہلیتی طریقہ کار اور دیگر معلومات CBSE نے اپنے انفارمیشن بلیٹن (Information Bulletin) کے ذریعے امتحان دینے والے امیدواروں کے لیے اپنی اسی آفیشیل ویب سائٹ پر مہیا کرائی ہے۔ امیدواروں کو چاہیے کہ آن لائن فارم بھرنے سے پہلے اس انفارمیشن بلیٹن کا مطالعہ کر لیں۔ آئندہ مضمون میں ہم اس پر تفصیل سے روشنی ڈالیں گے۔
