اورنگ آباد شہرمیں پیش آیا حیران کن واقعہ ؛ تجاوزات ہٹانے آئی جے سی بی کو ہی ناراض لوگوں نے لگادی آگ

اورنگ آباد: (کاوش جمیل نیوز) : شہر میں ایک چونکا دینے والا واقعہ سامنے آیا ہے، تجاوزات ہٹانے کے لیے آئے میونسپل کارپوریشن کے جے سی بی کو آگ لگا دی۔ یہ واقعہ شہر کے بیڑ بائی پاس سے متصل مکند نگر علاقہ میں پیش آی۔ پہلے جے سی بی کی کھڑکیوں کے شیشے توڑے گئے اور پھر اس جے سی بی کو آگ لگا دی گئی۔ بتایا جا رہا ہے کہ یہ واقعہ اس وقت پیش آیا جب ایک ٹیم اس علاقے میں ایک بوڑھی خاتون کے گھر سے تجاوزات ہٹانے گئی تھی۔ اطلاع ملتے ہی پولیس بھی موقع پر پہنچ گئی تھی۔
پچھلے کچھ دنوں سے اورنگ آباد میونسپل کارپوریشن شہر میں تجاوزات کے خلاف سخت کارروائی کر رہی ہے۔ اب تک کئی اہم سڑکوں اور چوکوں پر قائم تجاوزات کو مسمار کیا جا چکا ہے۔ دریں اثنا، میونسپل کارپوریشن کی انسداد تجاوزات ٹیم اسی طرح کی کارروائی کرنے کے لیے بیڑ بائی پاس کے قریب مکند نگر علاقے کے جیجاو نگر، راج نگر علاقے میں پہنچی تھی۔ اس بار اس علاقے میں ایک بوڑھی خاتون کے گھر سے تجاوزات ہٹانے کے لیے ٹیم کے جانے کے بعد بڑا احتجاج ہوا۔ یہی نہیں بلکہ پہلے میونسپل کارپوریشن کی جے سی بی پر پتھراؤ کیا گیا اور پھر جے سی بی کو آگ لگا دی گئی۔ جس میں جے سی بی مکمل طور پر جل کر خاک ہوگئی۔ فی الحال مقامی پولیس نے موقع پر پہنچ کر تفتیش شروع کردی ہے۔
اورنگ آباد شہر میں جہاں ایک طرف تجاوزات کے خلاف کارروائی کی جارہی ہے وہیں دوسری طرف پراپرٹی ٹیکس کے بقایا جات کی وصولی کی مہم بھی چلائی جارہی ہے۔ ایڈمنسٹریٹر جی شری کانت کے حکم کے مطابق اور ڈپٹی کمشنر اپرنا تھیٹے کی رہنمائی میں میونسپل کارپوریشن کی جانب سے تمام زون دفاتر میں بقایا جائیداد ٹیکس اور پانی پٹی کی وصولی مہم زور و شور سے چلائی جارہی ہے۔ اسی مناسبت سے آج (26 اکتوبر) زون آفس نمبر 1 کے اسسٹنٹ کمشنر سنجے سورادکر کی رہنمائی میں وارڈ نمبر 15 مٹمیٹا کے جوزف لوئس بپسٹ کے سلور لان کے خلاف بقایا جات کی وجہ سے کارروائی کی گئی ہے۔ لان کو سیل کر دیا گیا کیونکہ اس لان پر کل 20 لاکھ 64 ہزار روپے کا بقایا تھا۔ اس موقع پر ٹیم کے سربراہ اویناش مدی، امیت رگڑے، ریکوری اسٹاف وجے بھالےراؤ، اشفاق صدیقی، شیخ نعیم نے کارروائی کی۔