بی جے پی کی 195 ناموں کی فہرست میں واحد مسلم امیدوار، جانیں کون ہیں عبدالسلام؟
کیرالہ: (کاوش جمیل نیوز) :بی جے پی نے ہفتہ کو لوک سبھا انتخابات 2024 کے لئے 195 امیدواروں کی پہلی فہرست جاری کی ہے۔ اس فہرست میں جہاں کئی تجربہ کار لیڈروں کے نام شامل ہیں، وہیں اس فہرست میں واحد امیدوارعبدالسلام کو کیرالہ کے ملاپورم سے ٹکٹ دیا گیا ہے۔ آپ کو بتاتے چلیں کہ اس فہرست میں بی جے پی نے کیرالہ سے اپنے 12 امیدواروں کو ٹکٹ دیا ہے اور واحد مسلم امیدوار کا نام ہے عبدالسلام جنہیں ٹکٹ دیا گیا ہے ۔
کیرالہ میں بی جے پی نے مسلم امیدوارعبدالسلام پر اعتماد ظاہر کیا ہے کیونکہ وہ وہاں ایک سیکولر چہرہ ہیں۔ عبدالسلام کے نام پر کافی عرصے سے بحث چل رہی تھی جس کی آج تصدیق ہوگئی ہے۔ بی جے پی کی اگلی فہرست ابھی آنی ہے، اس لیے یہ دیکھنا باقی ہے کہ بی جے پی کتنے مسلم امیدواروں کو میدان میں اتارتی ہے اور کیا وہ کیرالہ جیسی دیگر ریاستوں میں بھی اپنی چال آزمائے گی۔
ڈاکٹر عبدالسلام ترور سے آتے ہیں اور بی جے پی لیڈر ہیں۔ عبدالسلام کالیکٹ یونیورسٹی کے وائس چانسلر تھے اور 2011 سے 2015 تک وائس چانسلر رہے۔ اس وقت، ان کی نامزدگی UDF نے کی تھی، جس پر کانگریس کا کنٹرول ہے۔ لیکن، سال 2019 میں وہ بی جے پی میں شامل ہو گئے۔ My Neta.info کے مطابق، ان کی مجموعی مالیت 6 کروڑ 47 لاکھ روپے ہے اور ان کے خلاف کوئی مجرمانہ مقدمہ درج نہیں ہے۔
آپ کو بتاتے چلیں کہ اتر پردیش میں بھی ایسی کئی سیٹیں ہیں، جہاں اقلیتی امیدوار کھڑے کیے جا سکتے ہیں۔ لیکن بی جے پی مکمل حساب کتاب کرنے کے بعد ہی امیدواروں کے ناموں کا اعلان کرتی ہے۔ مثال کے طور پر یوپی میں بی جے پی نے مسلم اکثریتی سیٹ سنبھل سے پرمیشور لال سینی، امروہہ سے کنور سنگھ تنور اور رام پور سے گھنشیام لودھی کو میدان میں اتارا ہے۔ رامپور میں، جہاں مسلم ووٹروں کا غلبہ ہے، گھنشیام لودھی نے گزشتہ ضمنی انتخاب میں کامیابی حاصل کی تھی اور 2014 کے انتخابات میں سنبھل سیٹ بی جے پی نے جیتی تھی۔ ایسا لگتا ہے کہ بی جے پی اپنے پرانے سماجی مساوات پر چل رہی ہے۔
