وزیراعلیٰ ایکناتھ شندے کے بیمار ہونے کا بہانہ بنا کر اجیت پوار کو وزیر اعلیٰ بنانے کی سازش کی شروعات ؛ کانگریس کے وڈیٹیوار کا سنسنی خیز دعویٰ

ممبئی: (کاوش جمیل نیوز) :قانون ساز اسمبلی میں قائد حزب اختلاف وجے وڈیٹیوار نے سنسنی خیز دعویٰ کیا ہے کہ ریاست میں حکومت بدحالی کا شکار ہے اور موجودہ وزیر اعلیٰ ایکناتھ شندے کی جگہ نائب وزیر اعلیٰ اجیت پوار کو لانے کی بی جے پی کی سازش ہے۔ اس لیے یہ جھوٹ بولا جا رہا ہے کہ شندے بیمار ہیں۔ وہ گڑھ چرولی میں منعقدہ پریس کانفرنس سے خطاب کررہے تھے۔
وڈیٹیوار قانون ساز اسمبلی میں اپوزیشن لیڈر منتخب ہونے کے بعد پہلی بار گڑھ چرولی آئے تھے۔ اتوار کو اعزاز کے بعد ودیٹیوار نے سرکاری ریسٹ ہاؤس میں پریس کانفرنس کی۔ انہوں نے کہا کہ پچھلے کچھ دنوں سے یہ کہا جا رہا ہے کہ وزیر اعلیٰ ایکناتھ شندے کی طبیعت ٹھیک نہیں ہے لیکن وزیر اعلیٰ کے دفتر نے اس کی تردید کی ہے۔ آج پھر وزیر اعلیٰ کے دفتر نے کہا ہے کہ ان کی طبیعت ٹھیک نہیں ہے۔
یہ سب بی جے پی کی سازش ہے اور وہ شندے کو بیمار بتاکر اجیت پوار کو وزیر اعلیٰ بنانے کی سازش کر رہے ہیں۔ ودیٹیوار نے دعویٰ کیا ہے کہ اسی پس منظر میں شرد پوار اور اجیت پوار کے درمیان ملاقات ہوئی تھی۔ ودیٹیوار نے یہ بھی کہا کہ اگر شرد پوار اجیت پوار کی ملاقات کے بارے میں اپنی پوزیشن واضح کرتے ہیں تو لوگوں کے ذہنوں میں موجود الجھن دور ہو جائے گی۔