پاکستانی فنکاروں کی مخالفت حب الوطنی نہیں ہے۔ ہائی کورٹ نے پاکستانی فنکاروں کے بھارت میں کام کرنے پرمستقل پابندی لگانے کی درخواست بھی کردی مسترد

ممبئی: (کاوش جمیل نیوز) :حب الوطنی ثابت کرنے کے لیے پڑوسی ملک کے فنکاروں سے دشمنی کی ضرورت نہیں۔ ہائی کورٹ نے کہا کہ درحقیقت پاکستانی فنکاروں کی مخالفت حب الوطنی نہیں ہے۔ اس نے پاکستانی فنکاروں کے بھارت میں کام کرنے پر مستقل پابندی لگانے کی درخواست بھی مسترد کر دی۔
ایک پاکیزہ ذہن رکھنے والا شخص ایسے پروگراموں کا خیرمقدم کرے گا تاکہ دونوں ممالک میں امن اور ہم آہنگی کو فروغ ملے۔ جسٹس سنیل شکرے اور جسٹس فردوس پونی والا کی بنچ نے یہ بھی نوٹ کیا کہ ایک سچا محب وطن بے لوث ہوتا ہے، وہ اپنے ملک کے لیے پوری طرح وقف ہوتا ہے، وہ قومی اقدامات کا خیر مقدم کرے گا۔ فیاض انور انصاری نے ایک پٹیشن دائر کی تھی جس میں مرکزی حکومت سے مطالبہ کیا گیا تھا کہ وہ پروڈیوسر ایسوسی ایشنز کے ساتھ ساتھ ہندوستانی سینما سے متعلق تنظیموں پر پاکستانی فلم سازوں، گلوکاروں، موسیقاروں، گیت کاروں اور تکنیکی ماہرین کے ساتھ کام کرنے پر مستقل پابندی عائد کرے۔
عرضی گزار کا مطالبہ ثقافتی ہم آہنگی، اتحاد، امن کو بگاڑنے والا ہے۔ ساتھ ہی، بنچ نے وضاحت کی کہ یہ ترقی پسند نظریات کے خلاف ہے اور اس کی حمایت نہیں کی جا سکتی۔ عدالت نے کہا کہ یہ مطالبہ پریشان کن ہے۔