جلگاؤں حادثہ: ایس ٹی بس کے بریک فیل ہونے سے دو موٹر سائیکلوں کو لگی ٹکر میں دو لوگوں کی موت ؛ تین افراد زخمی

جلگاؤں: (کاوش جمیل نیوز) : آج جلگاؤں کے چوپڑا شہر میں بھامرے اسپتال کے قریب ایس ٹی بس کی بریک فیل ہو گئیں اورخوفناک حادثہ پیش آیا۔ اس حادثہ میں دو موٹر سائیکلوں کوشدید ٹکرلگنے کے بعد چنچلے کے ایک نوجوان اور چوپڑا کے ایک نوشادی شدہ نوجوان کی موقع پر ہی موت ہوگئی۔ حادثے میں تین افراد زخمی بھی ہوئے، ایک شخص نجی اسپتال میں زیر علاج ہے۔
حادثے کے بعد چوپڑا شہر میں ہلچل مچ گئی ہے اور ایم ایل اے چندرکانت سونونے نے ڈاکٹروں کو فوری علاج فراہم کرنے کی ہدایت دی ہے۔ مزید معلومات یہ ہے کہ آج دوپہر 12 بجے کے قریب ایک چونکا دینے والا واقعہ اس وقت پیش آیا جب شہر کے ایک مصروف علاقے میں ایک تیز رفتار ایس ٹی بس نے دو دو پہیہ گاڑیوں کو کچل دیا۔ اس ہولناک حادثے میں پہلے دوپہیہ پر سوار رویندر بہارے (عمر 40، ساکن چنچلے) اور دوسری دو پہیہ پر سوار رئیس پٹھان عرف سونو (عمر 22، ساکن چوپڑا) کی موقع پر ہی موت ہو گئی۔ اور دیگر افراد میں انیتا بہارے اور شاکر شیخ زخمی ہو گئے۔ زخمیوں کو فوری طور پر چوپڑا کے سب ڈسٹرکٹ اسپتال میں داخل کرایا گیا ہے۔ یہ ہولناک واقعہ قریبی سی سی ٹی وی کیمرے میں بھی قید ہو گیا۔