بالاپور : میونسپل کونسل انتخابات 2025 : سینئر افسران کے لیے اعزازیہ کے احکامات، مگر درجہ 3 اور 4 کے ملازمین نظر انداز
بالاپور : ( ذاکر احمد) :میونسپل کونسل / میونسپل پنچایت کے عام انتخابات 2025 کے پس منظر میں انتخابی کام کے لیے مقرر کیے گئے افسران اور ملازمین کو اضافی وقت میں انجام دی گئی خدمات کے عوض اوور ٹائم بھتہ (اعزازیہ) دینے کے سلسلے میں حکومت کی جانب سے احکامات جاری کیے گئے ہیں۔ محکمۂ عمومی انتظامیہ کے یکم جولائی 2024 کے حکومتی فیصلے کے مطابق انتخابی عمل کے آغاز سے لے کر اس کے مکمل اختتام تک اضافی وقت میں کام کرنے والے افسران کو اعزازیہ دینے کی گنجائش رکھی گئی ہے۔
اسی تناظر میں ضلع کلکٹر دفتر کی جانب سے بعض سینئر افسران کو اعزازیہ ادا کرنے کے بارے میں متعلقہ میونسپل کونسلوں کو خطوط بھیج کر ہدایات جاری کی گئی ہیں۔ ان ہدایات کے مطابق ضلع کلکٹر اکولا سمیت اعلیٰ افسران کو میونسپل کونسل بالاپور کے ذریعے اوور ٹائم بھتہ ادا کرنے کے احکامات دیے گئے ہیں۔
لیکن دوسری جانب، انتخابات کے دوران میدان میں براہِ راست کام کرنے والے درجہ 3 اور درجہ 4 کے ملازمین کو نظر انداز کیے جانے کی باتیں سامنے آ رہی ہیں۔
موصولہ معلومات کے مطابق انتخابی مدت کے دوران کئی ملازمین نے مسلسل 20 سے 22 دن تک اضافی وقت میں کام کیا، اس کے باوجود انہیں اب تک کسی قسم کا اعزازیہ موصول نہیں ہوا ہے۔ انتخابی عمل کے دوران پولنگ مراکز کی تیاری، انتخابی سامان کی تقسیم، اور ووٹوں کی گنتی کی تیاری جیسی اہم ذمہ داریاں نبھاتے ہوئے جونیئر ملازمین نے بھرپور محنت کی۔
اس کے باوجود جب سینئر افسران کے لیے اعزازیہ کے احکامات جاری ہو چکے ہیں اور نچلے درجے کے ملازمین کو اس کا فائدہ نہیں ملا تو ملازمین میں ناراضگی کا ماحول پیدا ہو گیا ہے۔
اس معاملے کو سنجیدگی سے لیتے ہوئے حکومت اور ضلعی انتظامیہ سے مطالبہ کیا جا رہا ہے کہ درجہ 3 اور درجہ 4 کے ملازمین کے ساتھ بھی انصاف کیا جائے اور ان کے اعزازیہ کے بارے میں جلد از جلد فیصلہ کیا جائے۔
