اکولہ: انتخابی ماحول میں کلکٹرآفس کو بم سے اڑانے کی دھمکی، ای میل سے مچی کھلبلی ؛ سائبر پولیس کی جانچ جاری

اکولہ: (کاوش جمیل نیوز) :اکولہ ضلع کلکٹریٹ کو بم سے اڑانے کی دھمکی والا ایک ای میل موصول ہوتے ہی شہر میں سنسنی پھیل گئی۔ اطلاع ملتے ہی سٹی کوتوالی پولیس کے ساتھ خصوصی پولیس ٹیمیں فوری طور پر کلکٹریٹ پہنچ گئیں اور حفاظتی نقطۂ نظر سے پوری عمارت کو خالی کرا لیا گیا۔ اس اچانک کارروائی کے باعث کلکٹریٹ احاطے اور اطراف میں خوف و ہراس کا ماحول پیدا ہو گیا۔
ضلع کلکٹریٹ ضلع کا مرکزی انتظامی دفتر ہے، جہاں روزانہ سرکاری افسران، ملازمین اور عوام کی بڑی تعداد میں آمد و رفت رہتی ہے۔ جمعرات کو دفتری دن ہونے کی وجہ سے کلکٹریٹ میں معمول سے زیادہ بھیڑ موجود تھی۔ اسی دوران سرکاری ای میل آئی ڈی پر بم رکھنے کی دھمکی موصول ہوئی، جس کے بعد کلکٹریٹ انتظامیہ نے فوری طور پر پولیس کو آگاہ کیا۔
اطلاع ملتے ہی اعلیٰ پولیس افسران، بم ڈسپوزل اسکواڈ اور شوان دستہ موقع پر پہنچا۔ عمارت کے تمام شعبوں کی باریکی سے جانچ کی گئی، تاہم کہیں بھی بم یا کوئی مشتبہ شے برآمد نہیں ہوئی۔ تلاشی مکمل ہونے کے بعد یہ بات واضح ہو گئی کہ بم کی اطلاع محض افواہ تھی، جس پر افسران اور شہریوں نے اطمینان کا اظہار کیا۔ پولیس اب اس دھمکی آمیز ای میل کے سلسلے میں تفتیش کر رہی ہے، جبکہ سائبر کرائم شاخ یہ جاننے میں مصروف ہے کہ ای میل کس نے بھیجی اور اس کے پیچھے کیا مقصد تھا۔ تلاشی کے بعد دوپہر میں ضلع کلکٹریٹ کا دفتری کام کاج دوبارہ معمول پر آ گیا۔ سٹی کوتوالی پولیس اسٹیشن کے پولیس انسپکٹر سنجے گاوئی نے بتایا کہ اطلاع ملتے ہی فوری کارروائی عمل میں لائی گئی اور مکمل تلاشی کے دوران کسی بھی قسم کا بم نہ ملنے کی تصدیق ہوئی ہے۔ مزید تفتیش جاری ہے۔
قابلِ ذکر ہے کہ ضلع میں اس وقت بلدیاتی انتخابات کا مرحلہ جاری ہے۔ بالاپور میونسپل کونسل کے لیے 20 دسمبر کو ووٹنگ ہوگی، جبکہ 21 دسمبر کو چھ میونسپل کونسلوں اور ایک نگر پنچایت کی ووٹوں کی گنتی ہوگی۔ اس کے علاوہ میونسپل کارپوریشن کے انتخابی شیڈول کا بھی اعلان ہو چکا ہے اور 23 دسمبر سے نامزدگی فارم داخل کرنے کا عمل شروع ہوگا۔ ایسے حساس انتخابی ماحول میں ضلع کلکٹریٹ کو بم کی دھمکی ملنے سے تشویش میں مزید اضافہ ہو گیا ہے۔