سَرَل پورٹل پر اسکول سطح کی کمیٹیوں کی معلومات کی تازہ کاری کے سخت احکامات! تعلیم ڈائریکٹر کی جانب سے تمام اسکولوں کو ہدایت، رپورٹ پیش کرنا لازمی

بالاپور : (ذاکر احمد) :محکمۂ اسکولی تعلیم و کھیل، حکومتِ مہاراشٹر کی جانب سے بتاریخ 16 اپریل 2025 کو جاری کردہ سرکاری فیصلے کے مطابق، ریاست کے تمام اسکولوں میں مختلف کمیٹیوں کو یکجا کرکے چار اہم کمیٹیوں کی تشکیل لازمی قرار دی گئی ہے۔ ان کمیٹیوں کے صدور کی معلومات سَرَل پورٹل کے تحت اسکول پورٹل پر اپ ڈیٹ کرنے کی ہدایات جاری کی گئی ہیں۔
تعلیم ڈائریکٹر (پرائمری)، مہاراشٹر اسٹیٹ، پونے شرد گوساوی کی جانب سے جاری کردہ حکم کے مطابق اسکول سطح پر درج ذیل کمیٹیوں کا قیام عمل میں لایا گیا ہے:
1. اسکول مینجمنٹ کمیٹی
2. سَکھی ساوتری کمیٹی
3. خواتین شکایت ازالہ کمیٹی / داخلی شکایات کمیٹی
4. طلبہ تحفظ و جسمانی سہولیات ترقی کمیٹی
ان کمیٹیوں کے صدور کی معلومات پہلے ہی ضلع دفاتر کے توسط سے جمع کرکے این آئی سی کے ذریعے سَرَل پورٹل پر اپ ڈیٹ کر دی گئی ہیں۔ اسکول کمیٹی انفارمیشن مینو میں ضلع اور تعلقہ منتخب کرنے پر اسکولوں کے نام ظاہر ہوں گے، جن پر کلک کرنے سے تازہ فہرست دیکھی جا سکتی ہے۔ اگر معلومات درست ہوں تو کسی تبدیلی کی ضرورت نہیں ہوگی۔
جن اسکولوں نے اب تک معلومات فراہم نہیں کی ہیں، انہیں پرنسپل لاگ اِن کے ذریعے سَرَل پورٹل پر داخل ہو کر کمیٹی صدور کی معلومات خود اپ ڈیٹ کرنے کی سہولت دی گئی ہے۔ اس کے علاوہ، اگر پہلے سے درج معلومات میں کسی قسم کی ترمیم درکار ہو تو وہ بھی پرنسپل لاگ اِن کے ذریعے کی جا سکتی ہے۔
تعلیم ڈائریکٹر نے واضح ہدایت دی ہے کہ ریاست کے تمام اسکول فوری طور پر سَرَل پورٹل پر کمیٹی صدور کی معلومات اپ ڈیٹ کریں اور کی گئی کارروائی کی رپورٹ لازمی طور پر نظامتِ تعلیم کو پیش کریں۔ اس حکم کا مقصد اسکول سطح پر انتظامی شفافیت، تحفظ، شکایت ازالہ اور مجموعی ترقی کو مضبوط بنانا ہے۔
حکومت کے اس فیصلے سے اسکولوں میں نظم و نسق، طلبہ کی حفاظت اور تعلیمی سرگرمیوں کو نئی سمت ملنے کی امید ظاہر کی جا رہی ہے۔