یوم جمہوریہ 26 جنوری کو گیٹ وے آف انڈیا، ممبئی پرعظیم الشان کل ہند مشاعرہ کا انعقاد ؛ مہاراشٹراردو ساہتیہ اکیڈمی ممبئی کے چیئرمین نے کی معزز شخصیات اور محبان اردو سے کثیر تعداد میں شرکت کی اپیل
ممبئی: (کاوش جمیل نیوز) :مہاراشٹراردو ساہتیہ اکیڈمی، حکومتِ مہاراشٹر کے زیرِاہتمام ہر سال کی طرح اس سال بھی اردو زبان و ادب کے فروغ کے مقصد سے یومِ جمہوریہ 2026 کے موقع پر ایک شاندار کل ہند تاریخی روایتی مشاعرہ کا انعقاد 26 جنوری 2026 کو شام پانچ بجے سے رات 10 بجے تک کیا جا رہا ہے۔ یہ روایتی،ادبی، ثقافتی،و تاریخی پروگرام،جو کہ عروس البلاد شہر ممبئی کے تاریخی مقام گیٹ وے آف انڈیا پر منعقد کرنے کی روایت رہی ہے،اس سال بھی اپنی شان و شوکت کے ساتھ منعقد ہوگا، جس میں ملک بھر سے ممتاز و معروف شعرا اور سرکردہ شخصیات شرکت کریں گی۔اس کل ہند مشاعرے کی صدارت کانپور کے مشہور و معروف شاعر جوہر کانپوری کریں گے، جب کہ نظامت کے فرائض نامور ناظمِ مشاعرہ ندیم فرخ انجام دیں گے، جو اپنے منفرد اسلوبِ نظامت کے لیے شہرت رکھتے ہیں۔مشاعرے میں مہمانانِ خصوصی کی حیثیت سے:اجیت پوار(نائب وزیر اعلیٰ، وزیر برائے مالیات و منصوبہ بندی، اقلیتی ترقیات اور اوقاف )ایڈووکیٹ راہل نارویکر (اسپیکر، مہاراشٹر ودھان سبھا)مادھوری مسال (ریاستی وزیر: شہری ترقیات، ٹرانسپورٹ، سماجی انصاف، اقلیتی ترقیات و اوقاف)اروند ساونت ،روچیش جے ونشی (سکریٹری، محکمہ اقلیتی ترقیات)پرتبھا انگلے (کمشنر، مائنارٹی کمشنریٹ)کی موجودگی اس پروگرام کو مزید وقار بخشے گی۔ اس عظیم الشان مشاعرے میں ممتاز شعراے کرام اپنے کلام سے سامعین کو محظوظ کریں گے، ان میں: منظور ندیم، عرفان جعفری، حامد بھساولی، قمر سرور، تنویر غازی، واصف یار خان، طالب شولا پوری، ابراہیم ساگر، وشال باگھ، احمد اور رنگ آبادی، غلام ثاقب اور فاروق احمد شامل ہیں۔اس موقع پر مہاراشٹراسٹیٹ اردو ساہتیہ اکیڈمی کے چیئرمین سید حسین اختر نے اپنے بیان میں کہا کہ:“یہ کل ہند مشاعرہ اردو زبان و ادب کے فروغ کی ایک مضبوط کڑی ہے۔ مہاراشٹر اردو ساہتیہ اکیڈمی کے چیئرمین عالی جناب سید حسین اختر نے عوام الناس، ادب نواز طبقے، طلبہ اور اردو سے محبت رکھنے والے تمام افراد سے اپیل کی ہے کہ وہ اس مشاعرے میں کثیر تعداد میں شرکت کرکے اپنی موجودگی سے اردو زبان و ادب کے فروغ میں عملی حصہ دار بنیں۔ اردو ہماری مشترکہ تہذیبی شناخت ہے اور اسے زندہ رکھنے کی ذمہ داری ہم سب پر عائد ہوتی ہے۔انہوں نے مزید کہا کہ اس طرح کے ادبی اجتماعات نئی نسل کو اردو زبان و ادب سے جوڑنے میں اہم کردار ادا کرتے ہیں۔چیئرمین مہاراشٹر اردو ساہتیہ اکیڈمی ممبئی جناب سید حسین اختر نے سیکورٹی کے پیشِ نظر شرکاء حضرات سے گزارش کی گئی ہے کہ وہ دعوت نامہ اور شناختی کارڈ اپنے ہمراہ رکھیں۔
