اکولہ میں NEET موک ٹیسٹ 2026 پورٹل کا آغاز، طلبہ کو حقیقی امتحانی تجربہ فراہم کرنے کی کوشش؛ ایم ایل اے ساجد خان پٹھان کی پہل ،12 اپریل کو ہوگا مو ک ٹیسٹ ہوگا
اکولہ: (ڈاکٹر ذاکر نعمانی) :طبی تعلیم کے خواہشمند طلبہ کے لیے ایک اہم اقدام کے تحت “NEET موک ٹیسٹ 2026 پورٹل” کا آغاز کیا گیا ہے، جس کا مقصد طلبہ کو NEET امتحان جیسا حقیقی ماحول فراہم کرنا ہے۔ اس پلیٹ فارم کے ذریعے طلبہ اپنی تیاری کا مؤثر جائزہ لے سکیں گے اور اپنی کمزوریوں کی نشاندہی کر کے انہیں بہتر بنانے کا موقع حاصل کریں گے۔
اس پورٹل کے تحت طلبہ کو neet کا اصل امتحان جیسا ماحول، جامع کارکردگی تجزیہ اور کمزور پہلوؤں کو بہتر بنانے کے لیے رہنمائی فراہم کی جائے گی۔ خاص طور پر اکولہ کے طلبہ کے لیے یہ ایک سنہری موقع ہے کہ وہ ایک منظم اور مسابقتی ماحول میں اپنی صلاحیتوں کا مظاہرہ کریں، اپنی رینکنگ معلوم کریں اور دیگر طلبہ سے موازنہ کر سکیں۔یہ اقدام اکولہ مغرب کے رکن اسمبلی ساجد خان پٹھان کی رہنمائی میں شروع کیا گیا ہے، جس کا مقصد معیاری تعلیم کو ہر طالب علم تک آسان، منظم اور مؤثر طریقے سے پہنچانا ہے۔منتظمین کے مطابق اس پروگرام کا وژن ایسا تعلیمی نظام قائم کرنا ہے جہاں ہر طالب علم کو اپنی مکمل صلاحیتوں تک پہنچنے کا موقع ملے۔ اس کے ساتھ ساتھ دیہی اور شہری تعلیم کے درمیان فرق کو کم کرنا، اور طلبہ میں صرف نمبروں کے بجائے اعتماد، حکمت عملی اور وضاحت پیدا کرنا بھی اس کا اہم مقصد ہے۔اس مشن کے تحت حقیقی امتحانی طرز کے موک ٹیسٹ، شہر سطح کی رینکنگ، اور ڈیٹا پر مبنی تجزیہ فراہم کیا جائے گا، تاکہ طلبہ اپنی تیاری کو بہتر انداز میں سمجھ سکیں اور کامیابی حاصل کر سکیں۔موک ٹیسٹ میں شرکت کے لیے طلبہ کو آن لائن رجسٹریشن کرنا ہوگا، ایڈمٹ کارڈ ڈاؤن لوڈ کرنا ہوگا، مقررہ امتحانی مرکز پر ٹیسٹ دینا ہوگا، اور بعد ازاں نتائج اور رینکنگ دیکھ کر اپنی تیاری کا جائزہ لینا ہوگا۔بتادیں کہ مغرب کے رکن اسمبلی ساجد خان پٹھان ہمیشہ سےہی تعلیمی اور تعمیری کاموں میں صف اوّل میں نظر آتے ہیں۔ساجد پٹھان کی کوشش سے NEET موک ٹیسٹ 12 اپریل کو اکولہ شہر کے ماؤنٹ کارمل اسکول میں دوپہر ایک بجے سے 5 بجے تک ہونگا۔شہر کے طلبہ اس سے بھرپور فائدہ اٹھائیں ۔
