اتر پردیش میں شدید آندھی اور بے وقت بارش نے تباہی مچا دی ہے۔ تیز ہواؤں کے ساتھ ہونے والی موسلا دھار بارش کے باعث ریاست بھر میں 100 افراد کی موت ہو گئی ہے۔ مختلف علاقوں میں درخت اور بجلی کے کھمبے اکھڑ کر گر گئے جبکہ کئی گھروں کو بھی شدید نقصان پہنچا ہے۔ وزیر اعلیٰ یوگی آدتیہ ناتھ نے ہلاک شدگان کے اہل خانہ کے لیے مالی امداد کا اعلان کیا ہے۔ انہوں نے انتظامیہ کو ہدایت دی ہے کہ 24 گھنٹوں کے اندر متاثرہ خاندانوں تک امدادی رقم پہنچائی جائے۔
اموات کی ضلع وار تفصیل
بدھ کے روز اتر پردیش میں موسلا دھار بارش اور آندھی نے شدید تباہی مچائی۔ طوفانی ہواؤں کے سبب کئی مقامات پر حادثات پیش آئے۔ سب سے زیادہ نقصان پریاگ راج میں ہوا جہاں 21 افراد جاں بحق ہوئے۔ این ڈی ٹی وی کی رپورٹ کے مطابق مختلف اضلاع میں اموات کی تعداد درج ذیل ہے:
بھدوہی: 18 اموات
مرزاپور: 15 اموات
فتح پور: 10 اموات
اُناؤ اور بدایوں: 6، 6 اموات
پرتاپ گڑھ اور بریلی: 4، 4 اموات
سیتاپور، رائے بریلی اور چندولی: 2، 2 اموات
اس کے علاوہ کانپور دیہات، ہردوئی اور سنبھل میں بھی دو، دو افراد کی موت ہوئی ہے جبکہ کوشامبی، شاہجہاں پور، سونبھدر اور لکھیم پور میں ایک، ایک ہلاکت درج کی گئی ہے۔
بدھ کی شام اتر پردیش کے مختلف علاقوں میں اچانک موسم تبدیل ہو گیا۔ کئی مقامات پر گرد آلود طوفان دیکھنے کو ملا۔ ہواؤں کی رفتار اتنی تیز تھی کہ ہورڈنگز اور ٹین کے شیڈ ہوا میں اڑ گئے۔ درخت اور بجلی کے کھمبے گرنے سے کئی گاڑیوں کو نقصان پہنچا جبکہ بعض علاقوں میں گھروں کی دیواریں اور چھتیں بھی منہدم ہو گئیں۔ ملبے تلے دبے افراد کو نکالنے کے لیے ریسکیو ٹیموں کو ہاتھوں سے مٹی اور ملبہ ہٹانا پڑا۔
