اے آئی ایم آئی ایم اپڈیٹ: فاروق شابدی نے توڑی خاموشی، پارٹی فیصلوں پرکی کھل کر بات ؛ کیا کہا پڑھیں تفصیلی رپورٹ

مہاراشٹر: آل انڈیا مجلس اتحاد المسلمین (AIMIM) مہاراشٹر میں اس وقت سیاسی ہلچل دیکھنے کو مل رہی ہے جب پارٹی کے سینئر رہنما اورسابق ریاستی ورکنگ صدر فاروق شابدی نے اپنے عہدے اور پارٹی کی بنیادی رکنیت سے استعفیٰ دے دیا۔ اس معاملے پر کافی دنوں سے جاری خاموشی کو توڑتے ہوئے فاروق شابدی نے ویڈیو پیغام اورمیڈیا سے بات چیت کے دوران اپنا مؤقف واضح کیا۔
فاروق شابدی نے کہا کہ انہوں نے یہ فیصلہ کسی دباؤ، لالچ یا ذاتی مفاد کے تحت نہیں بلکہ ضمیر کی آواز پر لیا ہے۔ ان کے مطابق پارٹی کے لیے انہوں نے برسوں دن رات محنت کی، تنظیم کھڑی کی، کارکنان کو جوڑا اور مشکل حالات میں بھی پارٹی کا ساتھ نبھایا، مگر وقت گزرنے کے ساتھ کچھ فیصلے اور رویّے ایسے سامنے آئے جن سے وہ ذہنی طور پر متفق نہیں ہو سکے۔
انہوں نے کہا کہ پارٹی میں اختلافِ رائے کی گنجائش ہونی چاہیے، مگر جب بات کہنے والوں کو نظر انداز کیا جائے اور پرانے، محنتی کارکنوں کی قربانیوں کو پسِ پشت ڈال دیا جائے تو ایسے میں دل آزاری فطری ہو جاتی ہے۔ فاروق شابدی کے مطابق ان کی ناراضگی کسی ایک ٹکٹ یا عہدے تک محدود نہیں بلکہ یہ تنظیمی طریقۂ کار اور اندرونی فیصلوں سے جڑی ہوئی ہے۔
استعفیٰ کے بعد مہاراشٹر بالخصوص سولاپور اوراورنگ آباد کے سیاسی حلقوں میں چہ مگوئیاں تیز ہو گئی ہیں۔ پارٹی کارکنوں کا ایک طبقہ اس فیصلے سے مایوس نظر آ رہا ہے اور ان کا کہنا ہے کہ فاروق شابدی جیسے تجربہ کار اور زمینی سطح کے لیڈر کا جانا پارٹی کے لیے نقصان دہ ہو سکتا ہے۔
فاروق شابدی نے واضح کیا کہ وہ فی الحال کسی دوسری سیاسی جماعت میں شمولیت کے بارے میں کوئی اعلان نہیں کر رہے، تاہم آئندہ کا سیاسی راستہ عوام اور ساتھیوں سے مشورے کے بعد طے کریں گے۔ انہوں نے یہ بھی کہا کہ وہ عوامی خدمت کے مشن سے پیچھے نہیں ہٹیں گے اور حق و سچ کی آواز بلند کرتے رہیں گے۔
سیاسی مبصرین کا ماننا ہے کہ ایم آئی ایم پہلے ہی مہاراشٹر میں اندرونی اختلافات اور ٹکٹوں کی تقسیم کے باعث دباؤ میں ہے، اور ایسے وقت میں ایک بڑے لیڈر کا استعفیٰ پارٹی کے لیے تنظیمی چیلنج بن سکتا ہے۔ آنے والے دنوں میں یہ دیکھنا اہم ہوگا کہ آیا پارٹی قیادت ناراض رہنماؤں کو منانے میں کامیاب ہوتی ہے یا یہ اختلافات مزید گہرے ہو جاتے ہیں۔