چیف جسٹس کے بیان پر ملک بھر میں ہنگامہ، “کاکروچ جنتا پارٹی” ہوئی وائرل؛ صرف 3 دن میں 20 لاکھ افراد “کاکروچ جنتا پارٹی” میں شامل

نئی دہلی: (کاوش جمیل نیوز) :بھارت کے چیف جسٹس سوریہ کانت کے ایک بیان کے بعد ملک میں “کاکروچ جنتا پارٹی” (Cockroach Janta Party) نامی ایک طنزیہ اور ڈیجیٹل سیاسی مہم نے جنم لیا ہے۔ حیران کن طور پر اس مہم کے آغاز کے صرف تین دنوں کے اندر 20 لاکھ سے زائد افراد اس سے جڑ چکے ہیں، جبکہ سوشل میڈیا پر یہ تیزی سے وائرل ہونے والا ایک بڑا ٹرینڈ بن گیا ہے۔
یہ پورا معاملہ اُس وقت شروع ہوا جب چیف جسٹس سوریہ کانت نے 15 مئی کو ایک سماعت کے دوران بے روزگار نوجوانوں کے حوالے سے تبصرہ کیا۔ انہوں نے کہا کہ “کچھ بے روزگار نوجوان کاکروچ (جھُرَل) کی طرح ہوتے ہیں، جن کا کسی کاروبار میں کوئی مقام نہیں ہوتا۔ ان میں سے کچھ میڈیا میں چلے جاتے ہیں، کچھ سوشل میڈیا پر سرگرم ہوتے ہیں، کچھ آر ٹی آئی کارکن بن جاتے ہیں اور پھر سب پر حملے کرنے لگتے ہیں۔”
چیف جسٹس کے اس بیان پر سوشل میڈیا سمیت مختلف حلقوں میں شدید ردِعمل دیکھنے کو ملا۔ بہت سے نوجوانوں اور سماجی کارکنوں نے اسے بے روزگار طبقے کی توہین قرار دیا۔ اسی احتجاج کے طور پر “کاکروچ جنتا پارٹی” نامی ایک آن لائن تحریک شروع کی گئی، جسے مختصر وقت میں زبردست عوامی حمایت حاصل ہوئی۔
سوشل میڈیا پر اس تحریک کی مقبولیت مسلسل بڑھ رہی ہے۔ انسٹاگرام پر “کاکروچ جنتا پارٹی” کے 40 لاکھ سے زائد فالوورز ہو چکے ہیں، جبکہ ایکس (سابق ٹوئٹر) پر تقریباً ایک لاکھ افراد اس سے جڑ چکے ہیں۔ اگرچہ اس پارٹی کی کوئی سرکاری رجسٹریشن موجود نہیں ہے، لیکن ڈیجیٹل دنیا میں اس کی مقبولیت مسلسل بڑھتی جا رہی ہے۔ بعض سیاسی رہنماؤں نے بھی اس تحریک کی حمایت کا اظہار کیا ہے۔
دریں اثنا، چیف جسٹس سوریہ کانت کی جانب سے بعد میں وضاحت پیش کی گئی کہ ان کے بیان کو غلط انداز میں پیش کیا گیا اور اس کا مفہوم بدل دیا گیا۔