مہاراشٹر: اساتذہ تنظیموں کا بڑا احتجاج، اسکول بند کرنے والوں کے خلاف کارروائی کا اعلان؛ 9 جولائی کواسکول بند ہوئے تو کارروائی ہوگی، محکمۂ تعلیم کا سرکلر جاری
پونے: (کاوش جمیل نیوز) :ٹی ای ٹی (Teacher Eligibility Test)، اساتذہ کو بی ایل او (BLO) کی ذمہ داری سونپنے اور دیگر کئی زیر التوا مطالبات کے سلسلے میں ریاست مہاراشٹر کی مختلف اساتذہ تنظیموں نے جمعرات، 9 جولائی کو اسکول بند تحریک کا اعلان کیا ہے۔
ریاستی محکمۂ تعلیم نے واضح ہدایات جاری کرتے ہوئے کہا ہے کہ جو اسکول اس دن بند رہیں گے، ان کے ہیڈ ماسٹر، اساتذہ اور غیر تدریسی عملے (Non-Teaching Staff) کی ایک دن کی تنخواہ کاٹ لی جائے گی۔
گزشتہ کئی دنوں سے مہاراشٹر میں ٹی ای ٹی امتحان اور اساتذہ کی بی ایل او کی حیثیت سے تقرری کے معاملے پر تعلیمی ماحول گرم ہے۔ مختلف اساتذہ تنظیموں نے حکومت کے سامنے متعدد مطالبات رکھے ہیں، جن میں اہم مطالبات درج ذیل ہیں:
پہلے سے خدمات انجام دینے والے اساتذہ کو ٹی ای ٹی سے مستثنیٰ قرار دیا جائے۔
تمل ناڈو کی طرز پر اساتذہ کے لیے علیحدہ امتحان منعقد کیا جائے۔
ٹی ای ٹی امتحان صرف آن لائن طریقے سے لیا جائے۔
اساتذہ کو بی ایل او (BLO) کی ذمہ داریاں نہ دی جائیں تاکہ وہ مکمل وقت تدریسی خدمات انجام دے سکیں۔
15 مارچ 2024 کی منظور شدہ نئی عملہ جاتی (Staff Approval) پالیسی میں ترمیم کی جائے، کیونکہ اس سے دیہی علاقوں کی ابتدائی تعلیم متاثر ہو رہی ہے۔
تین جماعتوں کے لیے ایک ہی استاد مقرر کرنے کی پالیسی واپس لی جائے، کیونکہ اس سے طلبہ کی تعلیم پر منفی اثر پڑ رہا ہے۔
ان مطالبات کے حق میں اساتذہ تنظیموں نے 9 جولائی کو اجتماعی رخصت (Collective Leave) لے کر ریاست بھر میں اسکول بند تحریک، احتجاجی مارچ اور دھرنے دینے کا اعلان کیا ہے۔
اس تحریک میں مہاراشٹر کی متعدد نمایاں اساتذہ تنظیمیں شریک ہیں، جن میں:
مہاراشٹر ریاست پرائمری ٹیچرس کمیٹی
مرکزی اساتذہ تنظیم
اساتذہ تنظیم رابطہ کمیٹی
پرہار اساتذہ تنظیم
مہاراشٹر ریاست اساتذہ پریشد
ودربھ سیکنڈری ٹیچرس ایسوسی ایشن
کاسٹرائب اساتذہ تنظیم
آزاد سمتا اساتذہ تنظیم
مہاراشٹر ریاست مرکز پرمکھ سبھا
مہاراشٹر ریاست مرکز پرمکھ سنگھ
کولہاپور تعلیمی پلیٹ فارم
مہاراشٹر ریاست ہیڈ ماسٹر مہامنڈل
شامل ہیں۔
ادھر اس تحریک کے پیش نظر ثانوی و اعلیٰ ثانوی تعلیم کے ڈائریکٹر ڈاکٹر مہیش پالکر نے تمام علاقائی نائب ڈائریکٹروں، ضلعی تعلیمی افسران اور تعلیمی انسپکٹروں کو سرکلر جاری کرتے ہوئے ہدایت دی ہے کہ 9 جولائی کو کسی بھی صورت میں اسکول بند نہ رہیں۔
سرکلر میں مزید کہا گیا ہے کہ اگر کوئی اسکول اس دن بند پایا گیا تو اس اسکول کے ہیڈ ماسٹر، اساتذہ اور غیر تدریسی ملازمین کی ایک دن کی تنخواہ کاٹنے کی کارروائی کی جائے گی۔ محکمۂ تعلیم نے تمام متعلقہ افسران کو طلبہ کے تعلیمی مفاد کو اولین ترجیح دیتے ہوئے اس حکم پر سختی سے عمل درآمد یقینی بنانے کی ہدایت دی ہے۔
