مہاراشٹر:آرٹی ای داخلوں کے لیے 6 اپریل کو قرعہ اندازی؛ آر ٹی ای داخلوں کے لیے لاکھوں درخواستیں؛ منتخب طلبہ کی فہرست اور ویٹنگ لسٹ ہوگی جاری

پونے: (کاوش جمیل نیوز) :حقِ تعلیم قانون (آر ٹی ای) کے تحت نجی اسکولوں میں 25 فیصد محفوظ نشستوں پر داخلے کے لیے 6 اپریل بروز پیر قرعہ اندازی (لاٹری) نکالی جائے گی۔ اس قرعہ اندازی کے ذریعے منتخب طلبہ کی فہرست اور ویٹنگ لسٹ تیار کی جائے گی، جس کے بعد اسکولوں میں باقاعدہ داخلے کا عمل شروع ہوگا۔
پرائمری ایجوکیشن کے ڈائریکٹر شرد گوساوی نے ایک پریس ریلیز کے ذریعے یہ معلومات فراہم کیں۔ عدالتِ عالیہ نے محکمۂ تعلیم کی وہ شرط منسوخ کر دی تھی جس کے مطابق طالب علم کے گھر سے ایک کلومیٹر کے دائرے میں آنے والے اسکول کا انتخاب لازمی تھا۔ اس کے بعد محکمۂ تعلیم نے پہلے سے فارم بھرنے والے والدین کو دوبارہ درخواست دینے کا موقع دیا، جبکہ جنہوں نے فارم نہیں بھرا تھا انہیں بھی نئی درخواست داخل کرنے کی سہولت فراہم کی گئی۔
اس سال ریاست میں آر ٹی ای داخلوں کے لیے 8,701 اسکولوں میں 1,14,826 نشستیں دستیاب ہیں۔ 31 مارچ تک دی گئی آخری تاریخ کے اندر 2,89,498 درخواستیں موصول ہوئیں، جبکہ گزشتہ سال 3,05,151 طلبہ نے رجسٹریشن کروایا تھا۔ اس طرح اس سال درخواستوں میں کمی دیکھنے میں آئی ہے۔
گوساوی کے مطابق تعلیمی سال 2026-27 کے لیے آر ٹی ای 25 فیصد آن لائن داخلہ عمل کی قرعہ اندازی پیر (6 اپریل) کو مہاراشٹر اسٹیٹ کونسل آف ایجوکیشنل ریسرچ اینڈ ٹریننگ میں ایجوکیشن کمشنر کے ہاتھوں انجام دی جائے گی۔ اس کی براہِ راست نشریات یوٹیوب پر بھی کی جائیں گی۔ قرعہ اندازی کے بعد منتخب طلبہ کی اسکول وائز فہرست جاری کی جائے گی۔
محکمۂ تعلیم نے واضح کیا ہے کہ داخلہ عمل میں کسی بھی قسم کی انسانی مداخلت نہیں ہوتی۔ اگر والدین کو کسی قسم کی لالچ یا دھوکہ دہی کا سامنا ہو تو اس سے بچیں۔ کسی بھی بے ضابطگی کی صورت میں ضلع کے پرائمری ایجوکیشن آفیسر، میونسپل کارپوریشن یا متعلقہ حکام کے پاس یا ای میل کے ذریعے شکایت درج کرائی جا سکتی ہے۔ غیر قانونی سرگرمیوں میں ملوث افراد کے خلاف فوجداری کارروائی کی وارننگ بھی دی گئی ہے۔