اورنگ آباد: سہ ماہی ‘سنگ میل’ اور ‘مائیل اسٹون’ کی جانب سے مراٹھواڑہ کالج آف ایجوکیشن میں; ایس.ایس.سی و بی.ایڈ. کے ہونہار طلبہ کی پروقار تقریبِ تکریم کا انعقاد

اورنگ آباد: تاریخ: ۴ جولائی ۲۰۲۶مراٹھواڑہ کالج آف ایجوکیشن کے سہ ماہی ‘سنگِ میل’ اور ‘مائیل اسٹون’ کی جانب سے ایس.ایس.سی اور بی.ایڈ. کے امتحانات میں نمایاں کامیابی حاصل کرنے والے ہونہار طلبہ کی تقریبِ تکریم آج بڑے جوش و خروش کے ساتھ منعقد ہوئی۔
اس موقع پر مہمانِ خصوصی کی حیثیت سے مولانا آزاد کالج آف آرٹس، سائنس اینڈ کامرس کے پرنسپل ڈاکٹر مظہر احمد فاروقی تشریف لائے۔ پروگرام کی صدارت مراٹھواڑہ کالج آف ایجوکیشن کے پرنسپل ڈاکٹر شیخ عمران رمضان نے کی۔ اسٹیج پر ‘سنگ میل’ اور ‘مائیل اسٹون’کی ایڈیٹر ڈاکٹر کنیز فاطمہ (آئی.کیو.اے.سی. کوآرڈینیٹر)، ڈاکٹر شیخ تہمینہ ناز ،نائب ایڈیٹر، سنگِ میل و مائیل اسٹون اور ڈاکٹر مرزا محفوظ بیگ بھی موجود تھے۔
مہمانِ خصوصی کا تعارف ڈاکٹر سہیل زکی الدین نے پیش کیا۔ ڈاکٹر شیخ کاشفہ انجم نے کالج کے بارے میں تفصیلی معلومات حاضرین کے سامنے رکھیں۔ ڈاکٹر شیخ تہمینہ ناز (نائب ایڈیٹر، سنگِ مِیل اور مائیل اسٹون نے ‘سنگ میل’ اور مائیل اسٹون کے مقاصد و اہداف بیان کیے۔
ہونہاروں کا اعزاز:
چھترپتی سنبھاجی نگر کے ایس.ایس.سی. میں ضلع بھر میں اول آنے والے ۱۶ اسکولوں (مراٹھواڑہ کالج آف ایجوکیشن کی تجربہ گاہیں) سے ۳۳ ہونہار طلبہ کو ٹرافی اور تعریفی اسناد دے کر اعزاز سے نوازا گیا۔ اسی طرح بی.ایڈ. میں یونیورسٹی سطح پر امتیازی مقام حاصل کرنے والے مراٹھواڑہ کالج آف ایجوکیشن کے ۶ طلبہ کو یادگاری نشان پیش کر کے ان کی تکریم کی گئی۔ طلبہ کے ساتھ ان کے والدین کا بھی خصوصی اعزاز کیا گیا۔
مہمانِ خصوصی کا خطاب:
پرنسپل ڈاکٹر مظہر احمد فاروقی نے کہا، "تعلیم ہی اصل سرمایہ ہے۔ آج کے ہونہاروں نے صرف نمبر حاصل نہیں کیے بلکہ اپنی لگن، مستقل مزاجی اور والدین کی محنت کو سچ کر دکھایا ہے۔ کامیابی ایک سیڑھی ہے، منزل نہیں۔ آج کی کامیابی پر اِترائے بغیر کل کے لیے مزید محنت سے کوشش کریں۔ آپ ہی کل کے ڈاکٹر، انجینئر اور مثالی اساتذہ ہیں۔”
صدر کی رہنمائی:
طلبہ سے خطاب کرتے ہوئے پرنسپل ڈاکٹر شیخ عمران رمضان نے کہا، "چھترپتی سنبھاجی نگر میں ڈی ایم آئی سی تیزی سے ترقی کر رہا ہے۔ بڑی بڑی کمپنیاں یہاں آ رہی ہیں۔ سینکڑوں نوجوانوں کو وہاں روزگار ملے گا۔” انہوں نے طلبہ پر زور دیا کہ مستقبل میں آنے والے مواقع سے بھرپور فائدہ اٹھائیں۔ "وہ پیشہ منتخب کریں جو وقت کی ضرورت ہو۔”
پروگرام کی نظامت ڈاکٹر سہیل ذکی الدین نے کی جبکہ کلماتِ تشکر ڈاکٹر کنیز فاطمہ نے ادا کیے۔ پروگرام میں اساتذہ، والدین اور طلبہ کی بڑی تعداد موجود تھی۔
*’سنگ میل’ اور ‘مائیل اسٹون’ کا عزم:*
منتظمین نے آخر میں بتایا کہ ‘سنگ میل’ اور ‘مائیل اسٹون’ تعلیمی میدان میں ایسے ہونہار طلبہ کی حوصلہ افزائی کا کام آئندہ بھی جاری رکھے گا۔