مہاراشٹرمیں 3,798 اسکولوں کی جیو ٹیگنگ اب تک نامکمل، محکمۂ تعلیم نے 10 دن کی دی آخری مہلت؛ پڑھیں تفصیلی رپورٹ
ممبئی: (کاوش جمیل نیوز) :ریاست مہاراشٹر میں اسکولوں کی جیو ٹیگنگ کے عمل میں تاخیر پر محکمۂ تعلیم نے سخت ناراضگی ظاہر کی ہے۔ دستیاب معلومات کے مطابق ریاست کی 3,798 اسکولوں کی جیو ٹیگنگ تاحال مکمل نہیں ہو سکی ہے۔ اس سلسلے میں ایجوکیشن کمشنر سچندر پرتاپ سنگھ نے متعلقہ اسکولوں کو 10 دن کے اندر اندر یہ عمل مکمل کرنے کی واضح ہدایت دی ہے۔
ریاست کے تمام اسکولوں کے لیے ضروری قرار دیا گیا ہے کہ وہ اپنی جسمانی سہولیات اور اسکول کے مقام کی جیو ٹیگنگ کریں۔ اس کے تحت اب تک ریاست کے تقریباً 1,04,367 اسکولوں کی میپنگ مکمل ہو چکی ہے، تاہم 3,798 اسکولوں نے ابھی تک جیو ٹیگنگ سے متعلق کوئی کارروائی مکمل نہیں کی ہے۔ علاقائی دفاتر کی جانب سے بار بار یاد دہانی کے باوجود بعض اسکولوں کی لاپروائی برقرار رہنے پر انتظامیہ نے سخت موقف اختیار کیا ہے۔
ایجوکیشن کمشنر نے ہدایت دی ہے کہ جن اسکولوں نے اب تک جیو ٹیگنگ مکمل نہیں کی ہے، وہ آئندہ 10 دنوں میں یہ عمل ہر حال میں مکمل کریں۔ اس سلسلے میں پرائمری، سیکنڈری اور ہائر سیکنڈری تعلیم کے ڈائریکٹرز، ڈویژنل ڈپٹی ڈائریکٹرز آف ایجوکیشن، تعلیم افسران اور بلاک ایجوکیشن افسران کو سرکاری سرکلر کے ذریعے احکامات جاری کیے گئے ہیں۔
کمشنر نے یہ بھی واضح کیا ہے کہ اگر کوئی اسکول بند ہے تو متعلقہ تعلیم افسراس کی جانچ پڑتال کر کے اس کی درست معلومات یو-ڈائس (UDISE) پورٹل پر اپ ڈیٹ کریں۔ اس کے ساتھ ہی جن اسکولوں کی جیو ٹیگنگ نہیں ہوئی ہے، ان کی تفصیلی رپورٹ تمام تعلیم افسران اور انتظامی افسران کو ڈویژنل ڈپٹی ڈائریکٹر آف ایجوکیشن کے پاس جمع کرانی ہوگی۔ بعد ازاں، پرائمری، سیکنڈری اور ہائر سیکنڈری تعلیم کے ڈائریکٹرز ایک مشترکہ رپورٹ تعلیمی کمشنریٹ کو پیش کریں گے۔
قابلِ ذکر ہے کہ اسکولوں کے جسمانی مقام کو تصاویر کے ساتھ ٹیگ کرنے اور تمام سہولیات کی معلومات یکجا کرنے کے لیے مہاراشٹر ریموٹ سینسنگ ایپلیکیشن سینٹر کے ذریعے “مہا اسکول جی آئی ایس موبائل ایپلیکیشن” تیار کی گئی ہے۔ جیو ٹیگنگ کے عمل سے متعلق ہدایات اپریل میں ہی ریاست کے تمام اسکولوں کو دے دی گئی تھیں۔ اب تک 1,04,367 اسکولوں کی میپنگ مکمل ہو چکی ہے، جبکہ باقی 3,798 اسکولوں کو آئندہ دس دنوں میں یہ عمل مکمل کرنا لازمی ہوگا۔
