نیٹ پیپرلیک کا ماسٹرمائنڈ گرفتار، پونے کے ریٹائرڈ پروفیسر پی وی کلکرنی سی بی آئی کی حراست میں؛ نیٹ پیپرلیک کیس میں مہاراشٹر کنکشن بے نقاب، لاتور اور پونے سی بی آئی کے نشانے پر

ممبئی : (کاوش جمیل نیوز) :نیٹ پیپر لیک معاملے میں ایک بڑی پیش رفت سامنے آئی ہے۔ اس معاملے کے مبینہ ماسٹر مائنڈ کو سی بی آئی نے گرفتار کر لیا ہے، جس کی شناخت پی وی کلکرنی کے طور پر ہوئی ہے۔ سی بی آئی نے کلکرنی کو لاتور سے حراست میں لیا ہے، جبکہ یہ بھی انکشاف ہوا ہے کہ وہ این ٹی اے سے وابستہ رہا ہے۔
3 مئی کو منعقد ہونے والے نیٹ امتحان کا پرچہ پہلے ہی لیک ہونے کا انکشاف سامنے آنے کے بعد امتحان منسوخ کر دیا گیا تھا۔ اس معاملے میں اب تک کئی افراد کو گرفتار کیا جا چکا ہے، مگر اب سی بی آئی کے ہاتھ اصل ماسٹر مائنڈ تک پہنچنے کا دعویٰ کیا جا رہا ہے۔
ذرائع کے مطابق پی وی کلکرنی پونے میں کیمسٹری کے پروفیسر رہ چکا ہے اور چار سال قبل ریٹائر ہوا تھا۔ تفتیش میں یہ بھی معلوم ہوا ہے کہ اس کے روابط پونے میں بیوٹی پارلر چلانے والی منیشا واگھمارے سے تھے، اور اسی سراغ کی بنیاد پر سی بی آئی کی ٹیم لاتور تک پہنچی۔ بعد ازاں کلکرنی سے تفصیلی پوچھ گچھ کی گئی۔
لاتور کے کیلاش نگر علاقے میں واقع کلکرنی کے گھر پر اس وقت تالا لگا ہوا ہے، جبکہ اس کا خاندان پونے میں مقیم بتایا جا رہا ہے۔ سی بی آئی کی ایک اور ٹیم اب بھی لاتور میں ڈیرہ ڈالے ہوئے ہے۔
اسی دوران لاتور کے سُت مل علاقے میں ایک نجی کوچنگ کلاس چلانے والے شخص کے گھر پر سی بی آئی نے تقریباً 11 گھنٹے تک تلاشی مہم چلائی، جہاں سے کئی اہم دستاویزات بھی ضبط کیے گئے ہیں۔
نیٹ پیپر لیک کے سبب تقریباً 23 لاکھ طلبہ کا مستقبل متاثر ہوا ہے۔ اس صورتحال کے پیش نظر مرکزی حکومت نے 21 جون کو دوبارہ امتحان لینے کا اعلان کیا ہے۔ منسوخ شدہ امتحان کی فیس طلبہ کو واپس کی جائے گی، جبکہ نئے امتحان کے لیے کوئی اضافی فیس نہیں لی جائے گی۔
مرکزی وزیر تعلیم Dharmendra Pradhan نے بتایا کہ طلبہ کو اپنی پسند کا امتحانی مرکز منتخب کرنے کی اجازت ہوگی اور امتحان میں 15 منٹ کا اضافی وقت بھی دیا جائے گا۔ انہوں نے یہ بھی اعلان کیا کہ آئندہ سال سے نیٹ امتحان آن لائن طریقے سے منعقد کیا جائے گا۔