اکولہ: 20 جون کے بعد ودربھ میں بارش کی سرگرمیوں میں تیزی متوقع، ضلع اکولہ میں بھی کسان پُرامید

اکولہ : (محکمہ موسمیات کے ذرائع سے موصولہ اطلاعات کے مطابق ممبئی اور کونکن کے علاقوں میں 18 اور 19 جون کے دوران بارش کی شدت میں اضافہ ہونے کا امکان ہے، جبکہ ودربھ خطے میں 20، 21 اور 22 جون سے بارش کے بہتر سلسلے کا آغاز متوقع ہے۔
ذرائع کے مطابق فی الحال ریاست کے مختلف علاقوں میں کہیں کہیں بارش ہو رہی ہے، تاہم اس کا دائرہ محدود ہے۔ 20 جون تک بیشتر مقامات پر ہلکی یا درمیانی نوعیت کی بارش کا امکان ہے، جبکہ وسیع پیمانے پر بارش کے لیے مزید چند دن انتظار کرنا پڑ سکتا ہے۔
ضلع اکولہ اور اطراف کے علاقوں میں بھی کسان بارش کے منتظر ہیں۔ خریف سیزن کی تیاریاں آخری مرحلے میں ہیں لیکن خاطر خواہ بارش نہ ہونے کے باعث متعدد کسان بوائی کے حوالے سے تذبذب کا شکار ہیں۔ تاہم موسمی حالات میں متوقع تبدیلی کے بعد 20 جون سے بارش کی سرگرمیوں میں اضافہ ہونے کی امید ظاہر کی جا رہی ہے۔
ماہرینِ موسمیات کے مطابق 21 یا 22 جون سے شروع ہونے والا ہفتہ ریاست کے بیشتر علاقوں کے لیے خوش آئند ثابت ہو سکتا ہے۔ اس دوران ودربھ، مراٹھواڑہ اور وسطی مہاراشٹر کے مختلف علاقوں میں اچھی بارش کے امکانات ہیں۔
ادھر محکمہ موسمیات حالات پر مسلسل نظر رکھے ہوئے ہے اور اگر پیش گوئی میں کوئی تبدیلی ہوئی تو نئی اطلاع جاری کی جائے گی۔ عوام اور کسانوں سے اپیل کی گئی ہے کہ وہ صرف سرکاری موسمیاتی اطلاعات پر ہی اعتماد کریں۔