انتظامیہ سوئی رہی، عوام نے سنبھالی کمان! سڑک دھنس گئی، پل غیر محفوظ؛ شہریوں نے اپنی جیب سے کھڑا کیا ’حفاظتی حصار;بیلدارپورہ–اورنگپورہ راستے پر پل کی سائیڈ پائپ، اینگل بیریکیڈنگ اور رنگ و روغن کا کام مکمل؛ مستقل مرمت کے معاملے میں انتظامیہ پھر سوالوں کے گھیرے میں

زاکر احمد شیخ
بالاپور : شہر کی خستہ حال سڑکیں اور غیر محفوظ پل اب شہریوں کے لیے محض پریشانی کا باعث نہیں رہے، بلکہ ان راستوں سے گزرنا جان جوکھم میں ڈالنے کے مترادف بن گیا ہے۔ انتظامیہ کی جانب سے مستقل مرمت کا انتظار طویل ہوتا گیا تو آخرکار شہریوں نے ہی کمان سنبھال لی۔ اپنی جیب سے مالی تعاون جمع کرتے ہوئے شہریوں نے خطرناک مقام پر حفاظتی انتظامات قائم کر دیے۔
میونسپل کونسل دفتر کے سامنے سے بیلدارپورہ–اورنگپورہ کی جانب جانے والے راستے پر سڑک کا ایک حصہ طویل عرصے سے دھنس گیا تھا۔ پل کے اطراف مناسب حفاظتی انتظامات نہ ہونے کے باعث پیدل راہگیروں، طلبہ اور دو پہیہ گاڑی سواروں کے لیے حادثے کا خطرہ مسلسل منڈلا رہا تھا۔ ماضی میں حادثات رونما ہونے کے باوجود مستقل حفاظتی انتظامات نہ کیے جانے سے شہریوں میں شدید ناراضگی پائی جا رہی تھی۔
حادثات ہوئے، خطرہ برقرار رہا؛ آخرکار عوام نے ہی اٹھایا پھاوڑا!
مقامی شہریوں کے مطابق اس سنگین مسئلے کی جانب متعلقہ انتظامیہ کی کئی مرتبہ توجہ مبذول کرائی گئی، لیکن مستقل مرمت کی رفتار اطمینان بخش نہیں رہی۔ آخرکار شہریوں نے ’انتظار نہیں، اب خود پہل‘ کا راستہ اختیار کرتے ہوئے مالی تعاون اور محنت کے ذریعے ضروری مرمت اور بیریکیڈنگ کا کام شروع کیا۔
24 ستمبر کو بیریکیڈنگ اور رنگ و روغن کا کام مکمل
جمعرات، 24 ستمبر کو شام تقریباً 5 بجے پل کی سائیڈ پر پائپ اور اینگل کی مدد سے بیریکیڈنگ نصب کرنے کے ساتھ رنگ و روغن کا کام مکمل کیا گیا۔ اس عوامی مفاد کے کام میں مجاہد خان عرف مجو سیٹھ، رئیس سیٹھ، عبدالنّعیم، اسلم ممبر، حسنین خان، اکّو پہلوان، سید فاضل، راہل، پنٹو پٹھان، یوگیش سنگھ ٹھاکر، تابش خان سمیت دیگر شہریوں نے مالی اور افرادی تعاون پیش کیا۔ اس موقع پر سلطان خان بھی موجود تھے۔
عوام کا دو ٹوک سوال—کیا اب حفاظت کی ذمہ داری بھی عوام ہی کی ہے؟
جب شہری اپنی جیب سے رقم خرچ کرکے عوامی راستے کو محفوظ بنانے کے لیے آگے آ سکتے ہیں تو پھر سڑک اور پل کی مستقل مرمت کی ذمہ داری ادا کرنے کے لیے انتظامیہ کب آگے آئے گی؟ یہ سوال اب شہریوں کی جانب سے زور دار انداز میں اٹھایا جا رہا ہے۔
شہریوں کی یہ پہل فوری طور پر حادثات کے خطرے کو کم کرنے کی ایک قابلِ ذکر کوشش ضرور ہے، تاہم سڑک اور پل کی مستقل مرمت اور مکمل حفاظتی انتظامات کرنا متعلقہ انتظامیہ کی بنیادی ذمہ داری ہے۔ اب شہریوں کی نظریں اس بات پر مرکوز ہیں کہ انتظامیہ اس خطرناک راستے کی مستقل مرمت کے لیے کب ٹھوس اقدامات کرتی ہے۔